2.1 Inatsit atuuttoq

Meeqqanik angerlarsimaffiup avataanut inissiinermi Meeqqat tapersersorne­qarnissaannut Inatsisartut inatsisaat nr. 20, 26.juni 2017-imeersoq malin­neqartarpoq. Inatsimmi pingaarnertut anguniagaalluni meeqqat 18-it inorlu­git ukiullit tapersersorneqarnissaat. Malinnaaffigineqarnermili aamma 23-t tikillugit ukiullit ikiorserneqarsinnaapput.

Ilaqutariit paarsisartut assigiinngitsut pingasuupput: Nalinginnaasumik ilaqu­tariit paarsisartut (pilertortumik paarsisartut ilanngullugit), inuussutissarsi­utigalugu angajoqqaarsiat kiisalu nammineq aaqqissuussamik angajoqqaar­siat. Ilaqutariinnut paaqqinnittartunut inissinneqarsinnaanerup saniatigut meeraq ulloq unnuarlu paaqqinnittarfimmut aamma inissinneqarsinnaavoq.

 

Nalinginnaasumik ilaqutariit paarsisartut tassaapput meeqqanik paarsiner­minnut akissarsisartut. Nalinginnaasumik piffissaq tamakkerlugu paaqqinnit­tutut suliaqanngillat.

 

2021-mi ilaqutariit paarsisartut meeqqamut ataatsimut qaammammut akis­sarsiaat 5.278 kr.-nik annertussuseqarpoq. Akissarsiat qaffanneqarsinnaapput kommunalnestyrelsini nalilerneqarpat paaqqinninneq immikkut ittumik iliuuseqarfigisariaqartoq.

 

2021-mi pilertortumik piffissamilu sivikitsumi paaqqinninnermut akissarsiat qaffanneqarsimasut ulloq unnuarlu meeqqamut ataatsimut 502 kr.-uvoq. Meeqqamut pineqartumut ataatsimut ullunut unnuanullu 30-nut annerpaa­mik akissarsiat tunniunneqarsinnaapput. Tassanngaanniit nalinginnaasumik paaqqinninnermut akissarsianut akigititaq malinneqalissaaq.

 

Inuussutissarsiutigalugu ilaqutariit paarsisartut tassaapput ilaqutariit inun­nik isumagininnermi tunuliaqutallit imaluunniit assigisaanik inuussutissar­siornermi misilittagallit. Taamatut tunuliaqutaqarneq meeqqanik inuusuttu­nillu timikkut imaluunniit tarnikkut innarluutilinnik paaqqutarinninnissamut immikkut piumasaqaateqartoqarpoq. Inuussutissarsiutigalugu ilaqutariit paarsisartut akissarsiaat atorfinninnermilu atugaat Namminersorlutik Oqar­tussat kiisalu Kalaallit Nunaanni ulloq unnuarlu inissiisarfinni perorsaanermik suliallit akissarsianut isumaqatigiissutaat malillugu pisarput.

 

Nammineq aaqqissuussamik meeqqamik paaqqinninnermi angajoqqaatut oqartussaasoq angajoqqaarsiallu akunnerminni isumaqatigiissutaat atuuppoq. Amerlanertigut paaqqinnittut meeqqamut qanigisaasarput, aammali ilaquta­riit allaasinnaallutik. Qaammatinit pingasunit sivisunerusumik meeraq inis­sinneqarallassappat angajoqqaatut akisussaasup paaqqinnittussat kommuni­mit akuersissummik tunineqarnissaat isumagissavaa.

 

2.2 Kommunit aningaasartuutaanni ilaqutariit paarsisartut aningaasar­siaat

Naatsorsueqqissaartarfimmit ukiup ingerlanerani paaqqinnissimasut akissarsi­aannut paasissutissat pisortat akissarsialeriffianninngaanniit aaneqarput. Akissarsialeriffimmi paasissutissat atorlugit kommuninit nalinginnaasumik ilaqutariinnut paaqqinnittunut tunngasut, pilertortumik paaqqinnittut ilan­ngullugit, immikoortiterneqarput, akissarsiallu allat pingaartumik ilaqutariin­nut oqilisaassisartunut tunngasut aamma immikkoortiterneqarlutik. Taama­tuttaaq qaammatit akissarsiffiit malillugit akissarsiat immikkoortiterneqarsin­naanerannut periarfissaqarpoq, ataasiaannarlunilu paaqqinnissimasut akissar­siaat imaluunniit paaqqinninnermi akissarsianut qaffaanerit aamma immik-koortinneqarsinnaasimallutik.

 

Akileraartarnermut Aqutsisoqarfimmut paaqqinninnermi akissarsiat pillugit kommunit nalunaarusiortarput. Paaqqinninnermi akissarsiat akileraarusi­gassat A11-nik taasat atorlugit ukiup naanerani kommunit Akileraartar­nermut Aqutsisoqarfimmut nassiuttarpaat. A11-ni, paaqqinninnermut akissar­sisimasut, inuttut-normui ukiullu ingerlanerani aningaasat amerlassusaat kommuninit tulleriiaarlugit allattorneqartarput. Taamaasilluni akissarsialerif­fimmi paasissutissat Akileraartarnermut Aqutsisoqarfimmit paasissutissanik aamma uppernarsarneqarsinnaapput.

 

Tabelimi ataani takutinneqartumi nalinginnaasumik ilaqutariinnut paarsisar­tunut aningaasartuutit tamakkiisut takuneqarsinnaapput.

 

Takussutissiaq 2.1. Kommunit aningaasartuutaanni ilaqutariinnut paarsisartunut aningaasarsiat (mio. kr.)

	2019	2020	2021
Nalinginnaasumik ilaqutariinnut paarsisartunut aningaasarsiat	26,6	30,1	34,1
Pilertortumik paarsineq	4,4	3,2	3,9
Katillugit	31,0	33,3	38,0

Najoqqutaq: Pisartat akissarsialeriffiannit paasissutissat kommunit allaffissornikkut nalunaarsuisarfiannit Winformatik-imit paasissutissat tapertaralugit.

 

Nalinginnaasumik ilaqutariinnut paarsisartunut akigititat tassaapput:

 

Takussutissiaq 2.2. Ilaqutariinnut paarsisartunut akigititat (kr.)

	2019		2020	2021
Nalinginnaasumik ilaqutariinnut paarsisartunut aningaasarsiat (qaammammut)		5.068	5.134	5.278
Pilertortumik paarsineq (ulloq unnuarlu)	482		488	502

Najoqqutaq: Isumaginninnermut Naalakkersuisoqarfimmit akigititat 289, 290 aamma 291 malillugit.

 

Paaqqinninnermi akissarsiat saniatigut meeqqat atisaannut, nerisaqarneran­nut kiisalu kaasarfimmiunut aamma tapeqarpoq. Tapiissutilli akileraarusigas­saanngillat.

 

2.3 Nalunaarsuutinik saliineq atorneqarnissaannullu piareersarneq

Akissarsialeriffiup pingaarnertut siunertaraa angajoqqaarsianut akissarsiat eq­qortut tunniunneqarnissaat, Akileraartarnermullu Aqutsisoqarfimmut eqqor­tumik nalunaarusiornissaq. Kisitsisitigut paasissutissiarineqarsinnaasut asser­suutigalugu meeqqat paarsarineqartut inuttut-normui, paarsinerup anner­tussusaa (marloriaammik imaluunniit ataasiaannarluni akissarsiat malillugit), paaqqinninnermi piffissaq il.il. ilaatigut tamakkiineq ajorput, taamaattoqartil­lugu paasissutissat allat tunngavigalugit missiliorlugit naatsorsorneqartaria­qarlutik.

 

Paaqqinninnermi akissarsiat angajoqqaarsianut tunniunneqartarput taamaat­tumillu angajoqqaarsiat inuttut-normui atorlugit Akileraartarnermut Aqutsi­soqarfiup isertitanut paasissutissaataanni pisortallu akissarsialeriffianni nalu­naarsugaasarlutik. Pisortalli akissarsialeriffianni amerlanertigut aamma meeqqap inuttut-normua imaluunniit kinaaneranut paasissutissaasinnaasut ilanngunneqartarput. Angajoqqaarsialli akileraartussaatitaasut inuttut-nor­mui allaffissornikkut nalunaarsuisarfinni allaqqagaluartut meeqqap paar­sarineqartup inuttut-normua kisitsisini paasissutissani nalunaarsuutini allani amerlanertigut ilanngunneqartanngilaq. Assersuutigalugu inuup-normuinik nalunaarsuiffimmit ateq aamma ulloq inunngorfik atorneqarput, ilaqitariin­nut kisitsisitigut paasissutissani meeqqanut angerlarsimaffimmi najugaqan­ngitsunut qatanngutaannullu paasissutissat kiisalu kommunit allaffissor­nikkut nalunaarsuiffiannit Winformatik-imit meeqqanut paarsarineqartunut nerisaqarnermut kaasarfimmiunullu akiliutinut paasissutissat atorneqarlutik.

 

Meeqqap qaammatip qeqqani paarsarineqarnera aallartissinnaavoq, utaqqii­saasumillu angajoqqaarsiani allaniissinnaalluni angajoqqaarsiallu inoqarfim­mut allamut nuunneranni ilaasinnaalluni il.il. Kisitsisitigut paasissutissani qaammammi pineqartumi meeraq paarsarineqartutut ilanngunneqarpoq, qaammalluunnit tamakkerlugu paarsarineqarsimanngikkaluarpat. Meeraq qaammammi pineqartumi arlalinnik paarineqarsimasutut allaqqappat qaam­mammi pineqartumi paarsarineqarnera annerpaamik akissarsiaqarfiusimasoq malillugu naatsorsorneqarpoq.

 

Paarsinermut ilanngunneqarneq ajorput meeraq paarineqartutut ilisimane­qartinnagu. Aamma ukiup siulianit paarsinermut iluarsiissutit ilanngunne­qanngillat.

 

Kingusinnerusukkut saqqummersitami 2020-mi kisitsisit annikitsumik iluar­sineqarput.